Midkiiba afartii dhicis "Waxaa looga hortegi lahaa isbeddelada ku dhaca hab-nololeedka dumarka". Saynisyahanno ka tirsan jaamacadda Kobanheegan ayaa falanqeeyay uur-qaadista 91.427 intii u dhaxeysay 1996 iyo 2002. Dhammaan uurkaas la bartay, 3.177 waxay ku dhammaatay dhicis ka hor toddobaadka 22. Toddobaadka 16-naad, haweenka waxaa la weydiiyay qaab nololeedkooda ka hor rimidda iyo muddada uurka. Kuwii horey u dhicisoobay ayaa la weydiiyay caadooyinkooda kahor intaanay dhicin.
Daraasada ayaa shaaca ka qaaday in da'da, isticmaalka aalkolada, qaadista culus, shaqada habeenkii, iyo cayilnaanta ama culeyska xad dhaafka ah ayaa ahaa sababo la xiriira dhicis.
Da'da iyo isticmaalka aalkoladu waxay ahaayeen waxyaalaha ugu muhiimsan.
Baarayaasha ayaa ku andacooday in hadii haweenku awoodaan inay yareeyaan qodobadan halista ah ee heer aad u hooseeya, 25 boqolkiiba dhicinta ayaa laga hortagi karaa.
Si kastaba ha noqotee, saynisyahanno kale ayaa ka digay in daraasaddu aysan muujinayn in arrimahaasi ay sababaan dhicin.
Patrick Wolfe, oo ah borofisar ku takhasusay jaamacadda University College London, ayaa yiri:
Daraasadani ma abuureyso xiriir sababi kara oo u dhexeeya sababaha halista iyo dhicin. Daraasadu waxay leedahay xaddidaadyo tirakoob oo dhowr ah, gunaanadkeedana waxaa laga yaabaa inay ku xiran tahay fasiraad badan.